راسم صبي

سماع الكلمات

على مكتبي
ورقة وقلم
راسم صبي
ماسك علم
فعينه اليمين
بسمة أمل
وعينه الشمال
صرخة ألم

لقيته بينده
بيقول غيتوني
مسكت الأجندة
كتبت الحقوني
بصّيتله تاني
وشفت المفاجأة
فعلا لقيتني
راسم عيوني


بحاول أفسّر
شكل العينين
مين الشمال
ومين اليمين
لقيتني بغمّض
ومن كل عين
نزّلت دمعه
لأ .. دمعتين

فدموع يميني
لمست الحنان
لقيت المحبّة
فروح الجيران
وشفت الأصاله
فعين المواطن
وحب الجماعة
ساعة الادان

ودموع شمالي
سمعت الأنين
وشفت الستارة
بلونها الحزين
عليه العوض
يا أرض الكفاح
شبابك بيكبر
فيومك سنين

بحبك و مخلص
فحبّك أسير
لكن بلخّص
كلامي الكتير
فخور اني ابنك
عليكي حزين
خايف طيورك
منّك تطير

الحق كلمة قبيحة

بعلن رسالة معترف وبقولها كلمة صريحة
أهلا بفقدان الشرف أهلا بغمّة صحيحة

جوّا زمان مختلف

راكب على المرجيحة
اسم الصراحة اختلف

والحق كلمة قبيحة
ويا بخت من يوم عرف

حراميّة أو شبّيحة
فعلا بكل الأسف

بعلن بنبرة جريحة
اسم الصراحة اختلف

والحق كلمة قبيحة
أصل الايمان اتخطف

مات فقلوبنا سطيحة
وحياتنا صارت سلف

لابقالها لون ولا ريحة
راجل غريب إكتشف

نيولوك أو تسريحة
وبسرعة بقا مكتشف

سمّوها موضة صحيحة

بأمانة يادي الأرف

دي فضيحة بنت فضيحة
إسم البنات بقا شرف

والراجل إسمه سميحة

فعلا بكل الأسف

بعلن بنبرة جريحة
اسم الصراحة اختلف
والحق كلمة قبيحة

19-3-2009

((حروف خمسة))

رديت على تليفوني لما سمعت انه بيرن
كان صوت بنت
صوت بيخلّي القلب يحن

قلت الوو
قالت أيوة
قلت ازيك
قالت حلوة

قلت انا ممكن اعرف يعني ايه الجنسية
قالت فكّر
قلت شامية
او مصرية
فالغالب انتي خليجية
قالت طيب
جنسيتي انسانه عربية

قلت فبالي ومالو كويس ... ممكن تطلع بنت الريس
وتشغلني فجهة أمنية

قلتلها وايه المطلوب
قالت محتاجه محبوب

بس بشرط
يبقا مثقف
قمت فرحت
قلتلها انا كاتب ومؤلف

قالت ألّف
إكتب عن احساس بيخوّف

لما تكون جوا بلادك وبتتغرّب
لما الشمس تكون أدامك وبتبعد مش عايزة تقرّب
لما تحب تكون موجود بس بتهرب

عارف ليه ؟!
حاسس إن وجودك عالهامش ومجرّد إسم
مع إنّك موجود فالقلب ومرسوم رسم

تقصدي ايه بس استنّي
قالت عمرك ما هتفهمني
قلتلها انا فعلا مستغرب

جوا بلادي ليه هتغرّب
ولو قدّام الشمس هقرّب
ولما اكون موجود فالقلب عمري ما ههرب

ردّي عليا اسمك ايه
قالت فكّر
هما حروف خمسة مش اكتر

قلت غريبة !!
انتي مريبة
انا فعلا مش قادر افكّر


قالت شيء جواك وناسيه
بس فبالك !! أحيانا بتفكّر فيه

قلت ازاي ؟

قالت اهدى
ركّز واهدى
هتلاقي تفكيرك جاي


هبدأ تاني

لما تخاف على اخوك العربي مهما تكون الجنسية
لما تحط اديك فاديه علشان تكبر وتعليه
ايه معناه .. رد عليّا

قلت بيجري فدمّي محبّة وبيجري فدمّي الاخلاص
قالت كدا فاضل ليك حبّة وتبقا عرفت الاسم خلاص

قلت فبالي

فقلوبنا ولكن مشطوبة
وبعيده لكن محبوبة
جنسيتها قالت عربيّة

قلت انا كدا قرّبت أوصلك
بس سؤال
قالت اتفضل
قلت انا عايز اعرف اسمك

قامت ضحكت
قالت عارفة ان انا منسيه
بس هقولك
وهكرر برده الجنسية

انا عربية
فقلوبكوا لكن مشطوبة
وبعيده لكن محبوبة
بدأت تصرخ قالت ليا بصوتها العالي

اسمي عروبة
اسمي عروبة





قمت على صرختها بقول
ايه الاسم
ايه الاسم
لكن فقت وانا مذهول
أصله اتضح انه كان حلم
اه كان حلم